НОВИ САД – Медзи добитнїками наградох найуспишнєйшим студентом на новосадским Универзитету у школским 2013/14. року и дванацецеро нашо студенти, лєбо су по походзеню и Руснаци.
Винїмково награди за закончени студиї достали Ана Римар, Мирон Джуня и Деян Надь, док винїмково награди за успих под час студийох достали Андреа Рац, Ивона Чапко, Иґор Русковски, Даниєла Планчак, Звонимир Сабадош и Тияна Виславски.
Рутенпрес початком юния уж призначел же награду за найлєпшого студента на Польопривредним факултету достала Тат’яна Дудаш, винїмкову награду за успих под час студийох Душан Костич, а Владимир Костич за найлєпши резултати у спорту.
Додзелєни вєдно 1 325 награди – найуспишнєйшому студентови на Универзитету, найлєпшому студентови на каждим факултету, за винїмково награди за закончени студиї, за винїмково награди за посцигнути успих под час студийох, награди за посцигнути найлєпши резултати у уметносци, за найлєпши резултатати у спорту, награди „Милева Марич Айнштайн” и винїмково награди за наукову и фахову роботу.
Придаванє наградох було 1. юния у амфитеатру централного будинку Универзитету, а наградзени котри нє були на тей шветочносци, свойо награди можу превжац у студентских службох своїх факултетох, о чим вецей информациї єст на сайту Универзитету – www.uns.ac.rs