НОВИ САД – У амфитеатре централного будинку Универзитету у Новим Садзе пондзелок, 1. юния, додзелєни награди студентом за посцигнути успих у школским 2013/14. року, а медзи наградзенима и Татяна Дудаш з Кули, як и браца Душан и Владимир Костичови зоз Сримскей Митровици.
Татяна Дудаш достала награду за найлєпшу студентку Польопривредного факултету, зоз штредню оцену под час студираня 9,93. Вона закончела Фитомедицину, потим предлужела школованє на мастер студийох у Французкей, на напряме Оплеменьованє рошлїнох, а тераз є на пракси у Белґиї, дзе од септембра предлужи мастер студиї.
Душан Костич, студент другого року Факултету технїчних наукох достал награду за успих под час студийох зоз штредню оцену у дотерашнїм студираню 10,00, док Владимир Костич, студент пиятого року Медицинского факултету, награду достал за посцигнуте друге место на Першенстве держави у обегованю на 1 500 метери.
Душан и Владимир Руснаци по мацери и активни су члени рускей заєднїци у Сримскей Митровици.
Универзитет у Новим Садзе кажди рок своїм студентом додзелює награди за посцигнути успих у студираню, фаховей и науковей роботи, уметносци и спорту, хтори витворени у прешлим школским року.