НОВИ САД – Того тижня на штернац локацийох у Новим Садзе виложени билборди на хторих визначени школяре и школярски тими з териториї Нового Саду котри посцигли найзначнєйши успихи на републичних и медзинародних змаганьох у науки, уметносци и других обласцох.
Медзи найлєпшима на єдним билборду и Валентина Колошняї з Руского Керестура, тераз студентка журналистики, а у прешлим школским року матурантка Штреднєй уметнїцкей школи „Боґдан Шупут”, котра за свою роботу освоєла друге место на Републичней смотри.
Проєкт з назву „Учим+Знам=Вредзим” витворени од априла по септембер того року, у сотруднїцтве з новосадскима основнима и штреднїма школами, хтори кандидовали найлєпших школярох.
Були приявени вецей як 60 школяре, а фахови жири вибрал найлєпших з найлєпших, котри визначени на билбордох по новосадских улїцох.
– У нєшкайшей континуованей девалвациї дружтвених вредносцох и спатраньох, тоти млади людзе представяю вельку дружтвену вредносц и жадаме на нїх обрациц увагу, алє же би и їм то бул порив за дальше унапредзованє своїх знаньох и схопносцох и за посцигованє успихох на науковим, уметнїцким и спортким полю – наводза у Здруженю за промоцию дружтвеней одвичательносци, хторе порушало спомнути проєкт.
У витвореню тей идеї Здруженє потримали Город Нови Сад, Покраїнска влада и вецей медийни покровителє.