РУСКИ КЕРЕСТУР – Други дзень манифестациї „Днї керестурскей паприґи“, внєдзелю, 16. авґуста, програма по традициї була на Гиподроме „Леї”, дзе у организациї Конїцкого клубу (КК) „Русин“ отримани обегованя коньох дринґачох и ревиялни дефиле фиякерох. На програми були шесц єднопрагаци обегованя и єдно обегованє двопрагох, хтори на „Леї” прицагли красне число патрачох з Керестура и їх госцох, як и вельке число любительох конїцкого спорту з цалей Бачкей.
Гоч було барз спройно, видзени квалитетни и динамични обегованя, а домашнї КК „Русин“ зазначел красни успих, понеже у першим єднопрагацим обегованю на 1 800 метери за гарла понад три роки победзел Керестурец Янко Планчак зоз шейсцрочним Вихором. Ґу тому, исти джокей и исте гарло, спрагнуте з Меридианом з Пинївиц, у обегованю двопрагох завжали друге место.
У ревиялни дефиле фиякерох попри домашнїх, керестурских запрагох, участвовали и госци з Коцура и Крущичу.
Окрем конїцкей програми, на Лейох внєдзелю була орґанизована вистава продуктох ручних роботох, представели ше и члени Здруженя паприґарох „Капсикум анум”, служени паприґаш з вецей котлох, а пополаднє закончене зоз живу музику.
Вецей фотоґрафиї у окремней ґалериї на правим боку нашого сайту.
