ЗОМБОР/КУЛА – У Польопривредней фаховей служби у Зомборе представителє Новосадского гуманитарного центру 3. фебруара подписали контракти о додзельованю безповратних ґрантох пецерим учашнїком котри успишно закончели шицки циклуси обуки, хтори влонї орґанизовани у Кули и Апатину.
З пецерих, штверо учашнїки з кулскей општини, медзи нїма и Любица Няради з Руского Керестура, котра з прєктом жада унапредзиц туристичне понукнуце у своїм месце. Попри нєй, ґранти достали польопривредне ґаздовство Предраґа Нешовича з Кули, хторе ше занїма з продукцию ширтаки печаркох, пчоларка Татяни Мрдак зоз Сивцу и Каролина Есе з Кули, котра продукує рошлїни-присмачки.
Општина Кула часц SEED програми, хтору ше витворює од 1. януара 2014. по 31. децембер 2016. року у Албаниї, Сербиї и на Косове, пре злєпшанє обезпечованя роботи, доприношенє зменшаню худобства, родней ровноправносци и социо-економскому розвою у реґионє.
Ношитель SEED програми австрийска орґанизация Волксхилфе Солидаритат, з потримовку Аустриан Девелопмент Цооператион, а запровадзує го Новосадски гуманитарни центер у општинох Кула, Апатин, Владичин Ган и Сурдулица.
Роботна ґрупа Општини Кула задлужена за тот проєкт наявює же шицки учашнїки шицких циклусох обуки маю нагоду послац свой бизнис-план и у наступним периодзе конкуровац за ище 6 ґранти.