БЕОҐРАД – У Сербиї єст вше менєй дзеци котри напущую школу, а число нєписмених менше як скорейши роки, виявел вчера, на Медзинародни дзень писменосци, министер просвити Срдян Вербич.
– Формално бешедуюци, напредовали зме кед у питаню число дзецох котри напущую школованє, алє кед мераме функционалну писменосц, велї нашо школяре и кед законча школу оставаю нєписмени и нє можу буц хасновити члени дружтва – визначел Вербич.
Прето, як гварел, Сербия вше векши напруженя уклада до функционалного образованя одроснутих. Тераз єст 73 школи ширцом Сербиї у хторих ше реализує програму за основне образованє одроснутих, до хторих уключени коло 6 000 особи. То углавним припаднїки марґинализованих ґрупох, лєбо особи котри пре здравствени причини нє закончели порядне основне образованє, а познєйше жадали закончиц основну квалификацию.
Вербич у вияви Танюґу на Медзинародни дзень писменосци визначел же треба ище вельо того поробиц на мотивованю одроснутих же би ше ище баржей уключели до програмох цаложивотного ученя.
– Нєодлуга будзе закончени Национални рамик квалификацийох цо би, медзи иншим, мало уплївовац на векше число одроснутих котри ше жадаю врациц до школских лавкох и надополнїц препущене – гварел Вербич.