КУЛА – Месни смотри рецитованя у кулскей општини почню 2. марца, буду закончени 6. марца, а Општинска смотра будзе 14. марца – порадзене на вчерайшей схадзки Комисиї за рецитованє Културно-просвитней заєднїци Општини Кула.
Перша Месна смотра рецитаторох 2. марца будзе у Руским Керестуре, ютредзень у Кули, 4. марца у Сивцу, 5. у Червинки, а 6. марца у Липару и Крущичу.
Селекторка на шицких месних смотрох будзе Слободанка Настасич з Кули, а консултанти за руски и мадярски язик Михайло Зазуляк и Юлия Дороґхази. Пред меснима, у дзепоєдних местох буду отримани и школски смотри, а на шицких месних и на Општинскей смотри, як госци наступя дзеци з ПУ „Бамби”.
Општинска смотра рецитаторох „Максим Єкнич”, 47. по шоре, як и дотераз, будзе у Крущичу.