СЕРБИЯ – У нашей жеми вакцинованє дзецох обовязне, а родичи котри одбиваю вакциновац дзецко, маю плациц пенєжну кару од 20 000 до 50 000 динари. Медзитим, за векшину приявох хтори писали санитарни инспекторе, тоти родичи достали лєм опомнуца, пише портал 021.
Прешлого року до судох сцигли 1 283 вимоги за порушованє поступку на основи нєпочитованя Закону о защити гражданох од заразних хоротох, дзе спадаю и случаї кед родичи, або старателє, одбиваю вакциновац дзецко.
Кажди рок вше менше число дзецох вакциноване, а то ше найбаржей одноши на ММР вакцину. Закон о правох пациєнтох ґарантує же кажде ма право одлучовац о шицким цо ше дотика його здравя и живота, окрем у случайох кед то директно загрожує живот и здравє других. Дохторе гваря же кед векше число дзецох нєвакциноване, загрожени нє лєм вони, алє загрожене и здравє других дзецох.
Окрем родичох, або старательох котри нє сцу вакциновац дзецко, покарани можу буц и здравствени установи, за хтори у тим случаю кара од 100 000 до 800 000 динари, кед таки случаї нє приявя и нє запровадзую мири защити.