Микитово гудаци

автор зам
1.1k Опатрене

На фотоґрафиї, хтора висликована 1936., лєбо ´37. року, дакедишнї славни керестурски Микитово гудаци. Фотоґрафию зме достали од нашого познатого майстра вилївача Янка Микиту зоз Кули. Водзаци у Микитовим оркестру бул оцец вилївача Янка Микиту Владо Микита, котри грал на гушлї (стої з гушлю), а грал по ковтох, як ше теди гуторело (по нотох). Умар млади, як двацецпейцрочни, 9. мая 1945. року. На фотоґрафиї коло нього (з лївого боку), з бруґу – Янко Микита, оцец примаша Владу Микиту, а коло нього, з тамбуру, Яким Микита, його брат. На концу з лївого боку нєпознати гудак, алє ше власнїк тей фотоґрафиїЇ здогадує же го у оркестру познєйше заменєл и у нашим чаше познати керестурски гудак Любо Микита Чедо, познєйше длугорочни член Кирдових гудацох.

З правого боку примаша Владу Микити, тиж з тамбуру, стої теди дас шеснацрочни Владо Сопка. Випатра же фотоґрафия настала у популарней керестурскей Штранґарковей карчми на Вельким шоре, понеже жена котра шедзи, праве качмарчка Маря Штранґарова, а хлопи (кучи и шедзи), єй синове. По словох власнїка фотоґрафиї, Микитово гудаци грали даґдзе до 1944. року, а як гвари майстор Янко, од познатих гудацох постали познати вилїваче.

 

ПОВЯЗАНИ ТЕКСТИ