Миколай у Митровици, Беоґрадзе и Кули

автор мам/зам/маф
958 Опатрене

СРИМСКА МИТРОВИЦА/БЕОҐРАД/КУЛА – Внєдзелю, 18. децембра, пред вчерайшим шветом Святого Миколая, у грекокатолїцкей церкви Вознесеня Господнього у Сримскей Митровици и у церкви Святих Кирила и Методия у Беоґрадзе, дзе парох о. Владислав Варга, дочекани Миколай, котри дзецом подзелєл дарунки. Вчера, на саме швето, Миколай бул и у нашей церкви у Кули.

У Сримскей Митровици програма з нагоди Миколая була по дополадньовей Служби Божей, а у програми участвовали дзеци котри виучую руски язик у ОШ „Йован Попович“, при ма Моники Абодї-Митрович, дзеци котри виучую українски язик, як и младши дзеци, а шпиванки з нїма пририхтала ма Даниєла Горняк. Того дня церква була полна з дзецми и їх родичами, а Миколай у Митровици подзелєл 65 пакецики.

У нашей церкви у Беоґрадзе Миколай пакецики подзелєл по Служби, хтора була внєдзелю пополадню на 17 годзин, а подзелєни 18 пакецики. Як за Рутенпрес гварел о. Варґа, дзевецеро дзеци з родичами на тото дзень пошли до Коцура и Нового Саду, так же нє  були на програми з нагоди Миколая у своєй матичней парохоиї.

На програми з нагоди Миколая присуствовал и амбасадор України у Сербиї Олександер Александрович, котри дзецом подаровал українски лакотки и кнїжки о св. Миколайови и митрополитови Шептицкому, як и представителє Амбасади Зєдинєних Америцких Державох котри, як гварел о. Варґа, стаємни вирни у нашей беоґрадскей церкви, а дзецом тиж принєсли дарунки.

У грекокатолїцкей парохиї священомученїка Йосафата у Кули Миколай бул вчера, праве на швето, и дзецом подзелєл коло 80 дарунки, хтори по 500 динари финансовали родичи. Миколайови по Вечаршей Служби Божей, хтора була на 18 г., виронаучни дзеци зоз ш. Марию пририхтали кратку програму.

ПОВЯЗАНИ ТЕКСТИ