Мирослав Чакан у Совиту за медзинационални одношеня Општини Жабель

автор бас
1.2k Опатрене

ЖАБЕЛЬ – На вчерайшей схадзки Скупштина општини (СО) меновала Совит за медзинационални одношеня Општини Жабель, у хторим Руснацох представя Мирослав Чакан з Дюрдьова, котри меновани и за заменїка предсидателя того цела.

За предсидателя Совиту за медзинационални одношеня Општини Жабель меновани представитель сербского народу Милорад Раданов з Чуроґу. Як представителє сербского народу у Совиту ище Никола Павич зоз Жаблю и Срдян Пандуров з Чуроґу, представитель мадярскей националней меншини Чаба Чока з Темерину, а  представитель ромскей националней меншини Душан Радул з Чуроґу.

Мирославови Чаканови то други мандат у Совиту за медзинационални одношеня Општини Жабель и, як гварел, Совит отворени за шицки питаня вязани за витворйованє националних правох и медзинационални одношеня, а по тих питаньох заинтересовани з нїм можу бешедовац особнє, лєбо прейґ Подручней канцелариї Националного совиту Руснацох у Дюрдьове, у КУД „Тарас Шевченко”.

На вчерайшей схадзки СО Жабель були 23 точки дньового шору и одборнїки  єдногласно прилапели три одлуки о дальшей роботи општинских целох, дзевец звити о роботи явних подприємствох и установох хторим снователь Општина, як и єденац ришеня о способе функционованя општинских роботних целох и институцийох.

 

ПОВЯЗАНИ ТЕКСТИ