СРИМСКА МИТРОВИЦА – Вирни сримскомитровицкей парохиї, вєдно зоз численима госцами, на швето Вознесения Господнього преславели храмове швето – Кирбай.
Кирбайску службу у церкви предводзел парох и декан сримски, протоєрей ставрофор о. Михайло Режак, а зоз нїм служели ище тринацецерме священїки – Роман Ступяк зоз Миколошевцох, Владимир Седлак зоз Петровцох, Владимир Маґоч зоз Вуковару, Микола Ступяк зоз Канїжи и Олеґ Закалюк зоз Райово Села зоз сушедней Горватскей. Зоз нашей епархиї служели о. Дарко Рац зоз Бачинцох, о. Владимир Еделински Миколка зоз Беркасова, о. Алексей Гудак, о. Иґор Вовк зоз Вербасу, о. Владислав Рац зоз Коцура, о. Роман Кандрач, монах Студит зоз України, як и двоме домашнї римокатолїки.
Зоз православней Церкви присутни були диякон Бранко Йосич, богослов Димитриє Николич и Бранислав Павков, представнїк Церковного одбору. Тиж так, на Служби бул и директор Музею Сриму Деян Уметич, предсидатель Националного совиту українскей националней меншини Никола Ляхович, як и числени госци зоз Латярку, Беоґраду, Индїї и Босней.
У казанї о. Режак наглашел як треба вериц до Божей присутносци и попри тим же ше Господь вознєсол до нєба, бо вон источасно и обецал же останє з людзми кажди дзень до конца швета.
Домашнї парох о. Варґа подзековал домашнїм вирним на велькей жертви котру вони поднєсли даруюци свою помоц за комплетне билєнє цалей церкви зоднука и звонака, а тиж и фасади на парохиї.
Велї священїки, домашнї и госци, висловйовали вельку радосц же присуствовали на тим святочним Богослуженю и друженю после Служби, зоз чим ше потвердзела и Исусова присутносц у заєднїци хтора ше збера у Його мено.
У пополадньових годзинох ше кресцел и єден вирни, а браца Лабашово, Илия и Огнєн-Максим, после споведзи, прияли першираз Святу Причасц.
