КУЛА – Подпредсидатель Покраїнскей влади и покраїнски секретар за образованє, управу, предписаня и национални меншини-заєднїци Михаль Нїлаш вчера, 13. децембра нащивел Општину Кула, дзе з предсидательом Општини Перицом Видеканїчом, його заменїком Карольом Валком и покраїнску посланїцу и руководительку Оддзелєня за дружтвени дїялносци Општинскей управи Драґану Потпара бешедовал о сотруднїцтве у идуцим року, насампредз на планє оправяня обєктох образовних установох.
Госц и домашнї нащивели Економско-тарґовецку школу у Кули, за чийо адаптованє Покраїнски секретарият за образованє того року опредзелєл 10, а Општина Кула коло 5,5 милиони динари и роботи би мали буц закончени до початку нового школского рока. Домашня им була директорка Школи Даница Парошки.
Нїлаш з домашнїма у Кули нащивел и Мадярски културни центер „Непкер”, дзе тиж тирваю роботи на оправяню будинку, а пред вельким ювилейом хтори будзе означени нарок – 150-рочнїцу постояня „Непкеру”.
