Фотоґрафия Мишкового млїну, власнїка Осифа Раца, направена 1938. року. Находзи ше у Руским Керестуре, на Вельким шоре, а патри до слунка. Вєдно з млїном збудовани и дом за числену Рацову (Мишкову) фамелию, Осифа и його сина Кирила. Як познате млїн по Другей шветовей войни национализовани, а тераз стої празни по приношенє Закона о реституциї. На фотоґрафиї коло млїна видно и дакедишню артейску студню, такволану Лаґанову, бо ше находзела пред обисцом Ситкарових Лаґанових. То була стара вариянта студнї з котрей вода сама чурела, а була спущена до жеми и ґу нєй ше сходзело по ґарадичох. Фотоґрафию и нєшка чува нєвеста Осифа Раца, Наталия.