То и наслов драми Босанского народного театру зоз Зеници, у режиї Миряни Каранович (вона у нєй и бави), котра достала тогорочну Стерийову награду за текст сучасней драми (авторки Танї Шлївар), а наградзена була и млада хлопска улога у виводзеню Енеса Салковича.
На Медзинародним театралним фестивалу у Сараєве МЕСС медзи лєпшима були Босански народни театер, литвански „Ґалеб”, „Краль Иби” СНҐ з Любляни и „Три жими” ХНК зоз Заґребу. Куриозитет же наслов „Ми тоти на котрих нас нашо родичи спозорйовали” представя, у ствари, автентични новосадски ґрафит зоз осемдзешатих – спомнуте ище на розгварки по представи на тогорочним Стерийовим позорю.
Попри Стерийового позоря, котре ше уж шейсц децениї отримує каждей ярнєй сезони у Новим Садзе, беоґрадски БИТЕФ (конєц септембра) и сараєвски МЕСС (початок октобра), даваю публики прегляд актуалней (професийней) театралней творчосци, як з реґиону (екс-Ю), так зоз швета, у зависносци од концепту каждей зоз спомнутих смотрох. Остатнї два шлїдза скопски МОТ, а шицки три дакус „младши” од нашого „Позоря”. У медзичаше до конкуренциї вошли ище даєдни фестивали, як наприклад Новосадски ИНФАНТ, лєбо суботицки ДЕЗИРЕ, з розличним статусом и амбицию на театралней мапи реґиона, Европи…
У ощербеней политичней, та пошлїдково и културней слики тей часци швета, нащива єдней з начишлєних смотрох представя, медзи иншим, нагоду черанки искуствох и уметнїцких перспективох и праксох розбитого заєднїцкого простору дакедишнєй заєднїцкей держави.
Провадзаци найменєй два зоз спомнутих манифестацийох, патрач лєгко замеркує учасц дзепоєдного истого фалата, хтори индивидуални вибор селектора, алє и пошлїдок консензуса ширшей театралней пракси, до котрей спада векше число людзох нєпоштредно уключених до продукциї и орґанизациї, од режисерох, ґлумцох, драматурґох, уметнїцкей критики итд. Нєзвичайне освидоменє тому хто дакус баржей попровадзи шицко тото же Югославия жиє, гоч и на таки провизорни способ. И прето индикативни и теми, як лоньска представа „Комплекс Ристич” у режиї Оливера Фрлїча, котра на єден преширени способ спатра деконструкцию дружтва у котрим векшина з нас народзена, гоч сам Любиша Ристич ше нє виражел похвално о фалату котри подписує можебуц найвитворенше (младше) режисерске мено з тих просторох, попри Андраша Урбана и ище дзепоєдних.
И гоч БИТЕФ и МЕСС по концепту медзинародни смотри, нукашнї и вонкашнї политични обставини од дзеведзешатих спричинєли, за красне чудо, взаємну медзирепубличну унапряменосц и стабилизацию. Так же хасен двойнїсти – нагода видзиц цо нове у швеце и поконсултовац ше же як ше „диха” у сушедстве.
Теми тогорочней селекциї провадза актуални збуваня коло нас, од вибеженских кризох по грожаци процеси на медзинародней политичней сцени, о чим досц лєм обрациц увагу на урядови лоґо, односно мото смотри: слика чулки Доналда Трампа за МЕСС, односно БИТЕФ-ов мото „(Европа) На хрибце збешнєтого буяка”. Гоч, одлуки фахового жирия, публики, лєбо новинарох нє (вше) провадза у наградзованю тоти тенденциї. Того року на БИТЕФ-у ше видвоєли два (наградзени) фалати: Бечска „Урнебесна цмота” (ґран при „Мира Траилович” – одлука фахового жирия и награда „Политики”) – искуства медзинародних вояцких трупох з перспективи обичних людзох. „Свита число два” з Паризу попри награди на основи гласох публики, достала специялну награду „Йован Чирилов”, вєдно з либанским фалатом „Шедлаюци хмару”.
Тото цо значнєйше наглашиц, то вшелїяк ексцес остатнього фестивалского вечара на МЕСС-у, скорей виводзеня риєцкей представи „Нашо насилство и вашо насилство” у режиї Оливера Фрлїча. Фалат уж у иножемстве достал каребну прияву пре бласфемични и увредлїви деталї, а у Сараєве го одказали после велїх гроженьох. Но, алє после прициску явносци, директор фестивалу Нихад Крешевлякович пущел публику до сали на власну одвичательносц. Забрану приказованя представи вимагали ГКД „Напредак” зоз Сараєва, вецей нєвладово орґанизациї, покля кардинал верхбосански Винко Пулїч аж поднєс виновну прияву Тужительству БиГ. Площа „Сузан Зонтаґ” при Народним театре, у тот час дзе була виведзена представа, як и околни улїчки, були преполни зоз специялнима єдинками полициї.