ДЮРДЬОВ – Пондзелок, 12. децембра, у КУД „Тарас Шевчено” у Дюрдьове члени Роботного цела за младеж Националного совиту Руснацох (НС) младим представели роботу НС и Роботного цела за младеж.
О снованю НС, його компетенцийох, функционованю, членох, одборох и роботних целох своїм парняком бешедовал Иван Канюх, котри и на видео-биму приказал свою презентацию з толкованьом функциї и роботи, односно поняца НС. Толкованє ишло од снованя националних державох по Першей шветовей войни, та по права националних меншинох и їх законски реґулативи.
О самей роботи и цильох Роботного цела за младеж НС младим у Дюрдьове бешедовала Соня Гудак, котра визначела финансованє проєктох младих по наших местох и з якима змистами би требало конкуровац. На концу обидвойо презентере поволали младих же би обдумовали проєкти, наглашуюци же ше о шицких можлївих нєясносцох можу питац членом Роботного цела за младеж.
Подобни презентациї НС и Роботного цела за младеж НС дотераз отримани у Руским Керестуре, Новим Садзе и Коцуре, а плановане их отримац и у других наших местох.