РУСКИ КЕРЕСТУР – Штверо млади з даскелїх местох дзе жию Лемки у Польскей вчера нащивели Руски Керестур, дзе знїмали и прилог о Руснацох у нашей жеми за Интернет „Радио-Лемко” (www.radio-lemko.pl) хтори часц орґанизациї „Lemko tower”.
Оксана Грабан, Данько Горощак, Аня Шпитко и Варфоломий Лихтаньский до Керестура пришли туристично, врацаюци ше з лєтованя у Болгарскей, а нащивели и Беоґрад и Нови Сад, дзе були и у Руским културним центре.
У Керестуре нащивели значни институциї – Национални совит Руснацих, Дом култури, Водицу, керестурску церкву, Школу и Дописовательство „Руского слова”, а домашнї им бул Александер Мудри.
У валалє пребували єдну ноц, у шатрох при базену, по Сербиї путовали стопом, а так ше врацeли и назад до Польскей.
