НОВИ САД – Вчера у Новим Садзе почала дводньова Медзинародна универзитетска симулация Комитету реґионох ЕУ, на хторей участвую студенти универзитетох у Новим Садзе и Беоґрадзе и з 12 жемох реґиону. З новосадского Универзитету участвує и Иван Канюх з Нового Саду, а попри Скупштини АП Войводини и Покраїнскей влади, сход потримую и национални совити (НС) националних меншинох, так же на отвераню бул заменїк предсидателя НС Руснацох Йовґен Мудри.
Предсидатель Скупштини АП Войводини Иштван Пастор, подпредсидателька Скупштини АПВ Ана Томанова Маканова и представителє Скупштини и Покраїнскей влади привитали присутних и поручели же тота Конференция значна за формованє наших будуцих лидерох, пестованє мултикултуралносци и творенє добрих одношеньох з другима народами у Сербиї, та звонка нєй.
Учашнїки на симулацийох буду бешедовац о медзинародним економским сотруднїцтве як ришеню проблему нєзанятосци младих, значносци дружтвеней когезиї у мултикултуралним, вецейнационалним и вецейязичним штредку, а вибрани учашнїки годни буц у улоги городоначалнїка, предсидателя округу и реґиону, совитнїка и других реґионалних представительох, и так учиц о Комитету и рижних реґионох.
Предсидатель Скупштини АПВ Иштван Пастор наглашел же зме тих дньох мали нагоду видзиц цо значи свидомосц о чежини явно виповедзених словох и яки пошлїдки ноша. Шицким присутним поручел же важне пестовац свидомосц о медзисобней историйней, културней и економскей повязаносци.
Бешедуюци на отвераню, покраїнски секретар за образованє, предписаня, управу и национални меншини-заєднїци Михаль Нїлаш оценєл же медзинационални одношеня у Войводини традицийно добри, а инциденти на основи националней припадносци єст мало. З тей нагоди поручел же шицки гражданє маю єднаки права, а припаднїки националних меншинох муша буц свидоми же права буду постояц лєм кед ше буду хасновац.
На Медзинародней универзитетскей симулациї Комитету реґионох ЕУ з нашей жеми участвую студенти позберани коло Студентского здруженя БЕУМ, а орґанизує ше ю у рамикох проєкту „CoRIUSS Војводина”.