КОЦУР – Млєкарня „Дана” з Вербасу, хтора на двох одкупних местох у Коцуре од малих продуковательох одкупює млєко, уж дзешец днї од вецей продуковательох нє бере млєко пре утвердзени зменшани квалитет.
Як потолковал управитель млєкарнї Милорад Пудар, корективни мири направени же би ше людзом дало часу за злєпшанє квалитету млєка, а каждому з нїх потолковане на цо маю обрациц увагу. Пудар гварел же млєкарня нє може одкупйовац сировину хтора нє одвитуюцого квалитету, бо з такого млєка нє мож направиц квалитетни продукти.
– Нови прикладнїки млєка уж вжати и послати на дальшу анализу, а по доставаню резултатох, хтори чекаме початком идуцого тижня, будзе познате чи буду утаргнути корективни мири и чи одкуп будзе предлужени од шицких – гварел Пудар.