БЕОҐРАД – У скупштинскей процедури ше находзи Закон о вименкох Закона о трансплантованю хтори оможлїви швидше и лєгчейше доходзенє до орґанох за трансплантованє, понеже ше будзе подрозумйовац же кажди граждан Сербиї донор орґанох, окрем у случайох же то писмено одбиє.
Як предвидзене у Предлогу закона, особи котри нє жадаю дац орґани подпишу вияву о процивеню трансплантованя їх орґанох. Вияву ше будзе придавац вибраному лїкарови, котри ю за три днї муши придац до Управи за биомедицину.
Таки законски одреднїци постоя и у других державох, а способ доходзеня до орґанох за трансплантованє наволани „шпански модел”. Координаторка проєкту „Шанса за нови живот” др Єлица Аларґич з Клїнїчного центру Войводини гварела же трансплантациї єст вше вецей, алє ище вше нєдостаточно. Вона поручела же за розвой донорства важне орґанизовац здравствену систему и розвиц позитивне становиско о донорстве.
По терашнїм Законє о трансплантованю и од особох котри маю донорску карточку нє мож вжац орґан без дошлєбодзеня членох їх фамелиї.