БЕОҐРАД – На основи вименкох Закона о потупеньох, хтори прилапени пред трома мешацами, гражданє можу достац меншу пенєжну кару кед припознаю потупенє. Подписане спорозуменє подрозумює же нє будзе судзеня и судских трошкох.
– Спорозуменє нє мож подписац кед особа за остатнї два роки покарана, та кед за остатнї штири роки зробела виновне дїло з безпечносци у транспорту. Нє мож ше спорозумиц анї кед вожела насилно, виволала транспортне нєщесце, лєбо кед особа у єдней вимоги за подписованє спорозуменя облапела вецей як єдно потупенє – гварел за Радио-телевизию Войводини предсидатель Суду за потупеня у Новим Садзе Каменко Козарски.
З подписованьом спорозуменя ше заш лєм достава каребни поени, алє ше защитну миру забрани управяня з превозку нє вирека кед слово о забрани на 30 днї, а за забрану од штири мешаци ше кару скрацує на два мешаци.
– Процедура барз єдноставна. Кед достаню поволанку за порушованє поступку за потупенє, гражданє най иду до найблїзшей полицийней управи и виявя же сцу подписац спорозуменє о припознаваню потупеня, а службенїк превери чи то можлїве. Полицийна управа спорозуменє прешлїдзує до суду, хтори пресудзи.
Позитивне и тото же, наприклад, кед потупенє зробене у Лесковцу, спорозуменє мож подписац и у Новим Садзе, лєбо другим месце – гварел Козарски.