НОВИ САД – По 31. октобер тирва Явна поволанка за участвованє у програми „За чистейши и желєнши школи у Войводини” за чечуци школски рок, на хтору ше можу приявиц предшколски установи и основни и штреднї школи з Войводини. Програму ше орґанизує осми раз, а дотераз у нєй участвовали 373 образовни установи и додзелєни 222 награди.
Явну поволанку розписал Покраїнски секретарият за образованє, предписаня, управу и национални меншини-заєднїци, вєдно з ресорнима секретариятами за защиту животного штредку и за енерґетику, як и з Рухом горякох Войводини.
Прияви и план активносцох по 31. октобер треба послац на адресу: Покраїнски секретарият за образованє, предписаня, управу и национални меншини-национални заєднїци, Булевар Михайла Пупина 16, 21 000 Нови Сад, а вецей информациї о Явней поволанки мож видзиц на сайту Секретарияту – www.puma.vojvodina.gov.rs