Вовторок вечар нащивели зме Школу „Петро Кузмяк” у Руским Керестуре, а у физкултурней сали нас дочекали мали ґимнастичарки, хтори тот спорт тренираю лєм коло пол рока, алє уж з лєгкосцу робя гвизди, шпаґи, мости, багинди и друге.
Секцию ґимнастики того школского року уведол наставнїк физичного воспитаня Славко Пап, а у Керестуре ше тот спорт уж барз давно нє тренирало.
– Гоч то нє моя дисциплина, сцел сом започац секцию ґимнастики у Школи, бо сом видзел же дзивчата на одпочивкох руцаю премет странце, односно гвизди и робя рижни акробатики. Ґимнастика барз добри спорт, ту важна верткосц цела, еластичносц, цо при таких дзецох барз значне. У тих рокох як вони, ше и почина, розвиваю ше моторични способносци – потолковал наставнїк Пап.
Коло дзешец дзивчата зоз другей, трецей и штвартей класи Основней школи ґимнастику тренираю раз тижньово, а шицки з нїх нам гварели же ше им барз пачи тот спорт.
– Найбаржей ше ми пачи кед преврацаме багинди, робиме гвизди, стоїме на рукох. Любела бим научиц премет назадок. Ґимнастика добра за похребцину, а будземе и мудрейши – гварела нам Марґарета Чизмар, а єй пайташка Василия Пап додала же тренинґи нє напарти.
– Гееей, любела бим раз буц професийна ґимнастичарка. Вельо патрим на Ютюбу ґимнастичарох як вежбаю, та дацо и там научим – додала вона.
Як и у каждим спорту, и у ґимнастики найважнєйше перше ше добре зограц, та и керестурски ґимнастичарки на початку тренинґа коло 15 минути цело уводза до векших напорох, а потим прескакую маґарца, ходза по греди, преврацаю багинди напредок и назадок, робя премет странце и други вежби.
Кед зме одходзели зоз їх тренинґу, Яна Варґа поволала шицких зантересованих же би ше ґу нїм придружели, бо, як нам гварела, ґимнастика добра за розвиванє косцох и за похребцину, а на тренинґох ше и добре дружа.