КУЛА – Гоч ше на Младежским театралним фестивалє Войводини нє нашли медзи трома найлєпшима представами, дипломи, награди и похвали достали и поєдинци зоз представи „Врацим ше по вашо души”, Драмского студия „Арт” Дому култури Руски Керестур. Фестивал у Кули тирвал од 8. по 10. мая, а за тот час виведзени пейц младежски представи.
Перше место освоєла представа „Чаривнїк з Озу” Сербского културно-просвитного дружтва з Панчева, друге место „Стилски вежби” Кулского културного центру, а треце „Любовнїк велького стилу” Културного центру з Индїї.
Диплому за найлєпшу сценоґрафию достал Владимир Надь Ачим, за представу „Врацим ше по вашо души”, котри и режирал тоту представу. Медзи наградзенима за найлєпши епизодни ґлумецки витвореня Силвия Малацко, а за ґлумецки витвореня похвалєни тиж два ґлумици з керестурскей представи – Адриана Надь и Андреа Костелник.
Селектор на тогорочним шестим Младежским театралним фестивалє Войводини бул мр Милян Войнович.