КУЛА – На Литературним конкурсу за школярох штреднїх школох з општинох Кула, Зомбор, Апатин и Оджак, хтори у рамикох тогорочней Акциї „Мешац кнїжки” орґанизовали Културно-просвитна заєднїца Општини Кула и Народна библиотека Кула, награди достали и школяре з Руского Керестура и Кули.
Школяре могли конкуровац з писню, есейом и приповедку и на своїм мацеринским язику, а першу награду достала Мария Цвиїч з Ґимназиї „Велько Петрович” у Зомборе, другу Милана Бачевич з Ґимназиї „Никола Тесла” у Апатину, а трецу награду Марина Радоєвич з Туристичного напряму Штреднєй школи „Петро Кузмяк” у Руским Керестуре. Марина концом новембра достала и трецу награду за свой циклус любовних писньох на общим литературним конкурсу за „Видаковичово днї” у месце Рудо у Босней и Герцеґовини.
Похвали за свойо литературни роботи на Конкурсу достали Марко Буила (Коцур) з руского оддзелєня Ґимназиї „Петро Кузмяк” у Керестуре, та Тияна Барна и Алекса Козар з Економско-тарґовецкей школи у Кули.
Литературни роботи оценьовал мр Ратко Цицмил, а консултант за руски язик бул ма Александер Мудри.
Додзельованє наградох и похвалох будзе на ютре, 9. децембра на 12 г. у Библиотеки Економско-тарґовецкей школи у Кули.