Найвекши проблеми нєзанятосц, опадло число прихильнїкох ЕУ

автор бета/сен
765 Опатрене

БЕОҐРАД – Виглєдованє о активизму гражданох Сербиї окончене прешлого мешаца, указало же 51 одсто гражданох дума же наша держава нє идзе у добрим напряме, док позитивне становиско ма 28 одсто. Як найвекши проблеми гражданє наведли нєдостаток роботних местох и подли животни стандард.

Виглєдованє окончел Центер за шлєбодни виберанки и демократию (CESiD), у сотруднїцтве з националну коалицию за децентрализацию и Националним демократским институтом, а воно облапело обласци як цо то животни стандард, становиска о виберанковей системи у Сербиї, наших институцийох и политичних партийох, та питанє чи Сербия треба же би вошла до Европскей униї (ЕУ).

У виглєдованьох хтори робени 2011. и 2013. року, позитивне становиско спрам ЕУ мали од 62 до 66 одсто випитаних гражданох. Найновше виглєдованє указало же опада число гражданох котри думаю же би Сербия мала постац членїца ЕУ, та 50 одсто дума же треба, а аж 37 одсто дума же нє треба.

Гражданє маю мало довирия до политичних институцийох, алє и нєзависних целох, як цо Поверенїк за информациї од явного значеня, лєбо Защитнїк гражданох. Як и скорейши роки, указало ше же гражданє найбаржей веря Войску Сербиї (50 одсто випитаних), церкви (39 одсто) и полициї (38 одсто випитаних). До Влади Сербиї гражданє нє маю вельо довирия, а указало ше же мало знаю о роботи Народней скупштини.

Програмски директор CESiD Дьордє Вукович на представяню резултатох виглєдованя наведол же 50 одсто випитаних дума же виберанкова система нє оможлївює витворйованє дзеки гражданох. Вон потолковал же, насампредз, хиба у нєдостатку ґеоґрафскей репрезентативносци, понеже 107 општини нє маю представительох у парламенту.

ПОВЯЗАНИ ТЕКСТИ