НОВИ САД – З нагоди имплементациї нового Закона о явним информованю и медийох, котри прилапени прешлого року, о його хаснованю и искуствох у пракси бешедоване вчера, 27. новембра у Велькей сали Скупштини АП Войводини на Округлим столє з назву „Локални самоуправи и медийни закони – рок нулти”.
Уводни викладаня винєсли покраїнски секретар за културу и явне информованє Славиша Ґруїч, державни секретар у Министерстве култури и информованя Саша Маркович, Саня Станкович з Медийного оддзелєня ОЕБС-у, предсидатель Управного одбору Асоцияциї медийох Зоран Секулич и предсидатель Нєзависного дружтва новинарох Войводини (НДНВ) Динко Ґрухонїч.
У уводним слове модератор Округлого столу Недим Сейдимович, предсидатель Вивершного одбору НДНВ, привитал сам факт же ше после скоро 15 роки чеканя и наявйованя, конєчно цошка конкретне почало збувац и у сфери медийох, док державни секретар Саша Миркович гварел же 72 одсто медийох приватизоване, односно з 50 оглашених 36 достали нових власнїкох и же нїхто нє обчековал таке интересованє за медиї. Додал и же ше пририхтує нову Медийну стратеґию, хтора би мала буц принєшена нарок.
Синиша Ґруїч обрацел увагу на факт же после приватизациї у дзепоєдних општинох вецей нєт локални медиї, як и на зменшанє информативних змистох на язикох меншинох:
– На мадярским язику число програмох зменшане з петнац на шейсц, на словацким з осем на штири, на ромским з осем на два, на румунским зоз шейсц на два, на руским зоз штири на два, а горватка заєднїца остала без радийскей програми на локалу, док по приватизацию то мала у трох локалних асмоуправох. Праве пре спомнуте, Секретарият свойочасово предкладал же нє треба запровадзовац приватизацию покля ше нє пренайдзе сиґурни механїзем за очуванє досцигнутого уровню информованя – гварел Ґруїч.
На Округлим столє присуствовали велї представителє здруженьох новинарох, аналитичаре, а найвецей бешедоване о финансованю успишнєйше, лєбо менєй успишно приватизованих локалних медийох, цо ше указує як найвекши проблем у пракси.
И попри тим же нови закон наклада транспарентносц у проєктним финансованю, велї локални самоуправи нє розписую конкурси за финансованє медийох. И кед су розписани, єден з проблемох и же проєкти оценюю нєкомпетентни комисиї, а у даєдних штредкох ше Закон подполно потупює, дзе найбаржей страдаю менши локални медиї, та и медиї меншинских заєднїцох.
На концу представени и „Нарис акцийного плану за розвой явного информованя на локалним уровню и других алатох за злєпшованє локалного и реґионалного явного информованя”. Медийна аналитичарка Жужана Серенчеш наглашела же ше муши найсц адекватни модели финансованя – исти за шицких, и же ше средства нє шме зменшовац, алє звекшовац. Тиж так, по єй словох, шицки процедури ше муши окончовац по скорей утвердзених критериюмох, а з подполну транспарентносцу.
Шлїдуюца дебата о медийох на локалним уровню наявена за 18. децембер.