БЕОҐРАД – У нашей жеми найзагроженши „обични” гражданє, котри жадаю правну сиґурносц и потвердзенє же кед, поведзме, позбераю документи за дозволу за будованє – тоту дозволу и достаню, же зоз здравствену кнїжочку достаню одвитуюцу помоц лїкара, а же полиция придзе кед їх безпечносц загрожена – гварел защитнїк гражданох Саша Янкович.
У дебати о звиту Защитнїка гражданох за 2015. рок Янкович гварел же у прешлим року сцигли 28 вецей жалби гражданох як залоньским. Поверенїца за защиту ровноправносци Бранкица Янкович винєсла податок же ше людзе найвецей поносовали на потупйованє економских правох, а тоти права нє шму буц приводзени до питаня анї пре ришованє економскей кризи.
Стан у нєзависних институцийох хтори ше занїмаю за правами гражданох злєпшани, медзитим, остал проблем одношеня власци ґу нєзависним орґаном. Без пременки того одношеня нє годно напредовац у прегваркох за членство у Европскей униї, односно поглавйох 23 и 24, хтори ше занїмаю з владаньом правох, оценєл поверенїк за информациї од явного значеня Родолюб Шабич.
Предсидателька Дружтва судийох Сербиї Драґана Болєвич гварела же суди ище вше под политичнима уплївами, а же дзепоєдни суди у Сербиї преобтерховани з предметами, цо гражданом очежує приступ ґу ефикасному правосудству.