БЕОҐРАД – Защитнїк гражданох Саша Янкович того тижня Одбору за людски и меншински права представел свой звит за 2015. рок, у хторим визначел же прешли рок означели економски бриґи и правна нєсиґурносц, а найзагроженши бул обични граждан.
Прешлого року зменшане число реаґованьох гражданох процив Сербиї у судзе за людски права у Стразбуру, алє число притужбох Омбудсманови було за 28 одсто векше як рок пред тим. Причини найчастейше же гражданє почувствовали розлику медзи законом и праксу, закони приношени по швидким поступку, а державни службенїки часто нє були упознати зоз вименками законох и новима предписанями.
Окреме були загрожени барз худобни, деци, млади, старши особи, Роми, пациєнти у психиятрийних шпитальох, чежко хори, новинаре, ЛҐБТ популация, орґанизациї хтори промовую людски права, наведол Янкович.
Медийски закони нє допринєсли шлєбоди медийох, понеже велї локални медиї годни буц загашени, дзепоєдни нєтранспарентни, а звекшане и число прицискох и физичних нападох на новинарох.
Представителє владаюцей странки неґативно реаґовали на звит Омбудсмана и оценєли же то паушалне видзенє стану у обласци права и правней безпечносци. З другого боку, опозиция поручела же треба цалком применїц препорученя Защитнїка гражданох же би унапредзел стан у обласци людских правох.