Наймладши Керестурци указали свойо таланти

автор сен
1.2k Опатрене

 РУСКИ КЕРЕСТУР – Дзеци з вецей ґрупох танєчней секциї, шпиваче и  рецитаторе, та Тамбурови оркестер Дому култури Руски Керестур внєдзелю вечар, 15. мая, отримали уж традицийни рочни концерт дзецинских секцийох, на хторим пред полну Вельку салу Дому култури представели свою, алє и роботу своїх фахових руководительох.

Концерт отворели наймладши аматере Дому култури – пририхтуюца дзецинска танєчна ґрупа „Жабки”, хтора такой на початку направела добру атмосферу. З танцом „Венчик гопакох” представела ше младша дзецинска танєчна ґрупа, штредня з танцом „До млїну”, а старша танєчна ґрупа виведла танєц „Подскакуєм подубкуєм”. Танєчни точки пририхтали фахово руководителє фолклорней секциї и хореоґрафе Ґабриєла Саянкович и Сашо Палєнкаш.

Окрем танєчних точкох, публика барз добре прилапела и точки младих шпивачох –  Себастиян Надь, котри участвовал и у ТВ-емисиї „Пинково гвиздочки”, на концерту шпивал популарну композицию „Лутка”, квартет Марина и Сандра Джуджар, Виолета и Марґарета Чизмар шпивали писню „Фейсбукомания”, дует Елеонора Дудаш и Яна Настасич наступели зоз шпиванку „Чаривни заглавок”, а трио Матей Шепински, Иван Рац и Борис Жирош одшпивали композицию „Залюбени школяр”. Провадзел их Дзецински хор „Шкорванчки”, з хторим дириґовала Лидия Пашо.

Прешли рок бул успишни за рецитаторох, а окреме за Ребеку Семан, котра ше зоз рецитацию „Шкатулка” Меланиї Павлович пласовала и на Републичну смотру рецитаторох и внєдзелю наступела пред домашню публику.  Матей Шепински з писнюц „Михал Пашо” Гавриїла Костельника бул медзи найлєпшима у Войводини, а  на концерту наступел и Микола Еделински, котри з писню Дюру Папгаргая „Любов нє зна гранїци” того року участвовал на Зонскей смотри.  Рецитаторох пририхтала руководителька рецитаторскей секциї Ивана Дудаш.

Тамбурови оркестер Дому култури Руски Керестур, под руководотельством Юлияна Рамача Чаму, провадзел дзепоєдни точки, а самостойно на концерту виведол „Венчик руских шпиванкох”.

ПОВЯЗАНИ ТЕКСТИ