РУСКИ КЕРЕСТУР – Вноци (26. мая) у Руским Керестуре у вельким огню цалком згорело закрице на хижи, шопи и помоцних просторийох, аж и єден трактор хтори бул под шопу, у Фрушкогорскей улїци число 100, власнїка Янка Пастернака.
Спрам перших спознаньох, огень вибухнул коло 2 годзин по пол ноци под шопу и барз швидко ше преширел и на други часци цалого закрица на хижи.
Огньогасцом о огню доявели сушеди, а о його велькосци шведочи и податок же го гашели 6 огньогасни камиони професийних єдинкох з Кули, Вербасу и Оджаку, два камиони добродзечних огньогасних дружтвох з Керестура и Крущичу, як и з єдней тракторскей цистерни, так же зопарли його ширенє на блїзки сушедни обисца. Гашенє одмагал и моцни витор, котри жирячки з погоренїска ношел до улїчки на заградох, у часци валалу воланей „Куцик”, а у ратованю помагали и сушеди и други Керестурци. У огню и гашеню нїхто нє настрадал.
Огень гашени скоро до рана, а ище и дополадня на лїцу места була єдна огньогасна превозка з Кули, з хторей гашене погоренїско.
Причини вибиваня огня за тераз нє познати, а утвердзую их процивогньогасни и криминалстични инспекторе, а материялна чкода барз велька.