БЕОҐРАД – Друга схадзка Републичного Совиту за национални меншини отримана вчера у шедзиску Влади Сербиї, а отворел ю предсидатель Влади Републики Сербиї Александар Вучич, котри на чолє того цела. Вучич наглашел же Влада одлучна на найвисшим уровню ришовац питаня хтори значни за шицки национални меншини у Сербиї.
На схадзки найвецей бешедоване о приватизациї медийох, як и ситуациї вязаней за пририхтованя за прегварки о поглавю 23 у процесу приступаня Сербиї до Европскей униї.
Кед слово о приватизациї локалних медийох хтори емитую програму на меншинских язикох, премиєр Вучич вимагал од ресорних министерствох же би ше нашло способ як зачувац тоти медиї. Споминане дефинованє законских мирох, у случаю же нови власнїк приватизованих медийох нє отрима тоту функцию, як и инициятива Координациї националних совитох же би спомнути медиї вообще анї нє уходзели до приватизациї покля нє будзе оформени законски рамик, пре континуитет информованя на меншинских язикох. У тим напряме, Совит за национални меншини би початком єшенї мал зашедац ище раз и розпатриц ришеня хтори потамаль буду предложени.
Представителє меншинских националних заєднїцох найвецей зауваги мали на ситуацию же од ресорних министерствох, з хторима Координация националних совитох ма сотрудзовац у процесу пририхтованя за прегварки з ЕУ, нє одвитую на предлоги и инициятиви хтори сцигую з Координациї, цо значи же сотруднїцтво нє функционує.
На другей схадзки Совиту спред державних орґанох участвовали подпредсидателька Влади и заменїца предсидателя Совиту, министерка Кори Удовички, министер вонкашнїх дїлох Ивица Дачич, министер просвити, науки и технолоґийного розвою Срдян Вербич, державни секретар у Министерстве култури и информованя Саша Маркович, о.д. директора Канцелариї за людски и меншински права Сузана Паунович, як и други ношителє функцийох у службох компетентних за обласц меншинских правох.
Спред меншинских националних заєднїцох на сходзе у Беоґрадзе були представителє шицких членох Координациї националних совитох, медзи нїма и предсидатель Вивершного одбору Националного совиту Руснацох Желько Ковач.