КОЦУР – У коцурским оддзелєню „Герлїчка” вербаскей Предшколскей установи того школского року до Пририхтуюцого оддзелєня по руски уписани шесцеро дзеци, з котрих лєм тройо нарок буду уписани до школи.
Як за Рутенпрес виявела воспитачка Серафина Яґлица, у дзецинскей заградки думали же ше после вецей мирох хтори порушал Национални совит Руснацох родичи предумаю и упишу дзецко до руского оддзелєня, алє за тераз то нє так.
У мишаним цалодньовим пребуваню того року єст коло 130, медзи нїма скоро половка руски дзеци. Активносц ше одвива по сербски, а дошлєбодзене бешедовац и по руски, а кельо з нїх нарок буду уписани до руского Пририхтуюцого оддзелєня, будзе познате аж при упису.