НАР и Завод подписали Протокол о сотруднїцтве

автор там/зам
936 Опатрене

НОВИ САД – Директор Заводу за културу войводянских Руснацох (ВР) мр Серґей Тамаш и предсидателька Новинарскей асоцияциї Руснацох (НАР) Мартица Тамаш вчера, 10. септембра, у Новим Садзе подписали Протокол о сотруднїцтве Заводу и НАР. На подписованю Протоколу присуствовала и єдна зоз сновательох и членїца Вивершного одбору НАР Єлена Перкович.

З тим протоколом Завод и НАР ше обовязали же вєдно буду реализовац едукацию о писаню проєктох и едукацию за унапредзенє професийних стандардох, а пре унапредзованє информованя, видавательства и роботи медийох, културно-уметнїцких и просвитних дружтвох Руснацох у Републики Сербиї.

НАР иницировала же би у едукациї о писаню и управяню з проєктами членом НАР и другим припаднїком рускей заєднїци помогнул Ресурсни центар гражданских инициятивох з Беоґраду, хтори и прилапел тоту инициятиву.

– Тих дньох ше профилує змист роботньох, а уедукациї важну улогу будзе мац и Завод за културу ВР, хтори обезпечи простор и други условия потребни за єй отримованє – гварела з тей нагоди Єлена Перкович.

Директор заводу мр Серґей Тамаш гварел же з подписаним Протоколом нашо руски фаховци и кадри достаню потребну едукацию у актуалних обласцох, цо допринєше змоцнєню наших институцийох.

– Буду вєдно конкуровац и при домашнїх и при европских фондох, а познате же сучасна Европа и єй институциї свойо активносци у велькей мири базую на гражданских инициятивох и активней учасци нєвладового сектору. Завод и през орґанизованє фахових семинарох потримує цивилни сектор у рускей заєднїци и направи условия за формованє проєктних тимох здруженьох, у хторих ношителє активносцох буду нашо млади високообразовани кадри – гварел Серґей Тамаш, док предсидателька НАР Мартица Тамаш з тей нагоди визначела же Завод потримує НАР од його снованя:

– Уж треци рок за шором НАР фахово едукациї отримує праве у просторийох, так же тота помоц од велькей важносци – гварела Тамашова.

1-NAR-02

ПОВЯЗАНИ ТЕКСТИ