НАР през проєкти будує власни капацитети

автор апм
1.1k Опатрене

У просторийох Завода за културу войводянских Руснацох пондзелок отримана конференция за новинарох, односно перша инициялна схадзка учашнїкох проєкту „Приклади добрей пракси − драгоказ розуменя”.

Проєкт реализує Новинарска асоцияция Руснацох (НАР), а потримал го Покраїнски секретарият за медзиреґионалне сотруднїцтво и локалну самоуправу и ЕУ проєкт технїчней помоци орґанизацийом цивилного дружтва − ТАКСО.

На конференциї була и подсекретарка Покраїнского секретара за медзиреґионалне сотруднїцтво и локалну самоуправу Весна Пиперски Туцаков хтора гварела же циль проєкту цо лєпше информованє гражданох о Европскей униї прето же похопйованє процесох европских интеґрацийох на нєдостаточно високим уровню и гражданом треба приблїжиц цо то конкретно значи и яки директни уплїв проєкти маю на живот наших гражданох.

Членїца проєктного тиму Єлена Перкович визначела же тота конференция зволана з нагоди початка конкретних активносцох на проєкту а ширша явносц будзе информована о одвиваню фазох проєкта.

Перковичова додала же ше у НАР хвильково случую два паралелни ствари − афирмованє европских проєктох а источашнє ше будує и власни капацитети, и з тей нагоди подзековала ресорному Секретарияту хторе помогло же би НАР почал будовац свойо професийни капацитети.

Иншак, координаторка проєкту „Приклади добрей пракси − драгоказ розуменя” новинарка Анамария Ранкович з Рускей редакциї Радия Нови Сад, а у проєкту участвую новинаре зоз руских редакцийох − Радия и Телевизиї Войводини и новинох „Руске слово”.

sajt 1

ПОВЯЗАНИ ТЕКСТИ