БЕОҐРАД – Наталия Будински, професорка математики у керестурскей Основней и штреднєй школи з домом школярох „Петро Кузмяк”, нєшка, 27. мая, у Ґалериї Сербскей академиї наукох и уметносцох (САНУ) у Беоґрадзе отрима самостойне преподаванє „Математика и ориґами”.
Преподаванє орґанизує Центер за промоцию науки у рамикох манифестациї „Май мешац математики”, а з тогорочну назву „Особи математики”, медзи котри прешлого мешаца вибрана и Будинскова.
Кажда з дзешец вибраних „Особох математики” мала свойо преподаванє, а нєшкайше Будинсковей, крем з Центру на промоцию науки, буду слухац и представителє управи Школи „Петро Кузмяк” и єй школяре, як и заинтересовани з других школох.
„Особи математики”, вєдно зоз своїма школярами, свою роботу презентовали и у емисиї „Контекст 21” на РТС-у, емитованей 21. мая. Наталия Будински у тей ТВ-емисиї участвовала зоз своїма школярами Марину Роман и Растком Бероньом.
Попри спомнутого, фотоґрафиї дзешец велїканох математики и дзешец „Особох математики” до конца мая виложени на Математичним факултету у Беоґрадзе, як и у городских тролейбусох у Беоґрадзе.
