РУСКИ КЕРЕСТУР – Наталия Будински, професорка математики у Основней и штреднєй школи з домом школярох „Петро Кузмяк”, медзи дзешец побиднїками конкурсу „Особи математики” („Лица математике”), хтори орґанизовал Центер за промоцию науки з нагоди тогорочней манифестациї „Май – мешац математики”.
На Конкурс ше приявели 200 наставнїки и професоре з цалей Сербиї, а дзешец побиднїкох вибрала комисия Центру за промоцию науки. Вибрани з Нового Саду, Убу, Лесковцу, Чачку, Баїней Башти, Смедерева, Країшнику, Лазаревцу и Руского Керестура.
„Особи математики” буду популаризовац математику, толковац ю на єдноставни способ и указац же кельо вона може буц и забавна.
Дзешецеро вибрани буду участвовац на презентациї у Беоґрадзе, у орґанизациї Центру за промоцию науки, як и у своїх местох и сушедних науковох клубох. Буду и части госци у медийох, бо Центер за промоцию науки запровадзи медийну кампаню же би их промововал як ґрупи, алє и поєдинєчно.
„Особи математики” буду и учашнїки на велькей математичней вистави, бо портрети побиднїкох, вєдно з їх добрима праксами, буду виложени у ґалерийох у Беоґрадзе.