РУСКИ КЕРЕСТУР – Наталия Будински, професорка математики у Школи „Петро Кузмякˮ з Руского Керестура, на 3Д друковачу видруковала визир за твар.
Наталия прейґ Фейбук ґрупи „Визионари Србијеˮ, у хторей ше збераю людзе зоз цильом же би направели цо вецей визири зоз помоцу 3Д друковача, а хтори потим дзеля медицинским роботнїком, пришла на идею же би и сама дала свойо доприношенє у борби процив ширеня вирусу корона.
За друкованє таких визирох потребни 3Д друковач хтори Наталия достала од „Йоханес Кеплерˮ Универзитету зоз Австриї на хаснованє у настави у керестурскей Школи. Тиж так, за друкованє потребни и модел визиру у диґиталней форми.
Як гварела Будинскова, за друкованє визирох потребне досц часу и специялни материял, та у складзе зоз можлївосцами даскельо защитни маски хтори направела подаровала до апатики и до Дому здравя дзецинскому диспанзеру у Руским Керестуре.
