НОВИ САД – На вчерайшей схадзки Управни одбор (УО) Руского културного центру (РКЦ) у Новим Садзе за директорку РКЦ вибрал Наташу Макаї Мудрох, до прешлого тижня предсидательку УО РКЦ – дознава Рутенпрес од терашнього предсидателя УО Владимира Ивана.
На явни конкурс конкуровали дотерашнї директор Владимир Сивч и Наташа Макаї Мудрох, а з вчерайшим явним гласаньом, члени УО з векшину гласох за директора вибрали Наташу Макаї Мудрох.
УО РКЦ ма 9 членох, на схадзки присуствовали седем, а двоме члени свойо гласи послали електронски, так же Мудрох Макайова достала вєдно 7, а Сивч 2 гласи. Пре право на жалбу, по 15. децембер Наташа Макаї Мудрох будзе окончователь длужносци директора, а на штиророчни директорски мандат би мала ступиц 16. децембра, одлучене на вчерайшей схадзки УО.
Тиж так, УО суґеровал же би Владимир Сивч бул розпоредзени на роботне место у РКЦ.
Прешлого пондзелку, 23. новембра, место Наташи Макаї Мудрох за члена УО РКЦ вибрана Саня Полдруги, а за предсидателя УО Владимир Иван.