НОВИ САД – Зачуванє идентитету и унапредзенє положеня шицких националних заєднїцох у Войводини у верху приоритетох Покраїнскей влади, визначел пияток, 15. юлия предсидатель Покраїнскей влади Иґор Мирович на сходзе з делеґацию националних совитох румунскей и словацкей националней меншини.
Мирович визначел важносц заєднїцкого дїйствованя и полного сотруднїцтва институцийох на шицких уровньох, та злєпшаня положеня румунскей, словацкей, и других националних заєднїцох у Войводини, гвари ше у сообщеню з Покраїнскей влади.
Предсидатель Покраїнскей влади тиж гварел же ше, кед у питаню национални заєднїци, ґу ришованю постояцих проблемох приуступи озбильно, у розумних терминох и през заєднїцке сотруднїцтво.
Предсидатель Националного совиту (НС) Румунох Даниєл Петрович упознал предсидателя Мировича з проблемами у роботи установох хторим снователь, лєбо соснователь НС, а представителє НС Словацох, на чолє з його предсидательку Ану Томанову Маканову, визначели же словацка национална заєднїца у Войводини того року означує значни културни ювилей – 150 роки од виводзеня першей театралней представи на словацким язику.
Предсидатель Мирович иницировал и розгварку з нововибраним посланїком зоз шорох словацкей националней меншини Павелом Суровим, пре зберанє коло заєднїцких проєктох и ришованє спорних питаньох.
