ВУКОВАР – Млади Руснаци з Войводини на ютре, 19. децембра, госцую у Вуковаре, у Горватскей, дзе им домашнї буду активисти Союзу Русинох Републики Горватскей. Домашнїм будзе представена часц нашей сучасней творчосци у култури и науки, алє и дружтвене орґанизованє младих Руснацох у Сербиї.
На тим стретнуцу будзе представене Здруженє младих „Pact Ruthenorum”, проєкт „Медзинародни волонтерски камп” у Руским Керестуре, часопис за младих „МАК”, Одсек за русинистику на новосадким Филозофским факултету, Виглєдовацки круг, Роботне цело за младеж Националного совиту (НС) Руснацох и Завод за културу войводянских Руснацох (ВР).
На програми, хтора почнє на 16 годзин (найвироятнєйше у просторийох Союзу Русинох) наступя млади руски писателє, а зоз свою музику ше представи и наш кантавтор Сашо Палєнкаш.
Одход до Вуковару орґанизую Роботне цело за младеж НС и Завод за културу ВР, а у рамикох медзинародного сотруднїцтва з Руснацами звонка Сербиї.
Як за Рутенпрес гварел предсидатель Роботного цела за младеж Сашо Сабадош, програма наменєна насампредз младим Руснацом, а проєкт представяня ше запровадзує на основи Протоколу о сотруднїцтве медзи НС Руснацох и Координацию радох Рускей националней меншини у Горватскей.