ВЕРБАС – Часц обовязней фаховей пракси з обласци медицини студентки зоз шветових универзитетох – Мелинда Сопка и Петра Тот – пришли окончиц до Общого шпиталю Вербас, сообщене медийом з тей установи.
Мелинда Сопка з Руского Керестура тераз на другим року студийох за атлетского тренера на Универзитету Бетел у Зєдинєних Америцких Державох. Єй студиї облапяю и нагле допатранє, клїнїчну дияґнозу, тераупетски интервенциї и регабилитацию покалїченьох и медицинских станох, а у Вербаше була на оддзелєню Регабилитациї.
Пред тим як пошла на студиї до ЗАД, Мелинда коло 10 роки бавела фодбал – рекреацийно у Керестуре, а потим у клубу у Новим Бечею. После законченя факултету и здобуваня роботного искуства, Мелинда би ше любела и професийно занїмац зоз женским фодбалом.
Петра Тот з Малого Идьошу студентка першого року на Сеґединским факултету у Мадярскей и интересую ю ґинеколоґия и педиятрия. Праве прето є задовольна же мешац пракси векшину часу препровадзела на Оддзелєню ґинеколоґиї, акушерства з неонатолоґию у Вербаше.