НАШ ДРАГОЦИНИ КАМЕНЬ МЕДЗИ ФЕСТИВАЛАИ

автор оля русковски
739 Опатрене

Початком юлия, як то уж и вецейрочна традиция, отримани EXIT фестивал у Новим Садзе на велїчезней Петроварадинскей твердинї. Фестивал тирвал од 4. по 7. юлий, а як сообщели орґанизаторе – за пар днї го нащивело вкупно коло 200 тисячи людзох зоз вецей як 90 державох швета.

 

Першей ноци фестивалу през капури на Петроварадинскей твердинї прешло 56 тисячи людзох. Отверанє було, як и вше, святочне и спектакуларне, провадзене зоз огньометом и прекраснима фарбами, искрами, зарями котри ше розлївали по нєбе. Нащивителє ше розошали на 40 фестивалски бини и зони дзе уживали у музичних наступох познатих виводзачох по 8 годзин шлїдуюцого рана, кед и закончени остатнї наступ.

Же би публика могла уживац на шицких бинох заслужна була длугока лїстина хедлайнерох, а перши три вечари на Main Stage були праве числени рокере и кажди з нїх указал же и рок може пополнїц найзначнєйшу бину найвекшого фестивалу у тей часци Европи, повязац рижни ґенерациї и музични смаки.

Програму на главней бини найбаржей означел историйни концерт єдного з найвекших шветових бендох The Cure. Анї диждж котри падал под час наступу нє завадзал маси людзох же би уживала у найвекших гитох. Капки як кед би лєм звекшали тоту маґию котра була провадзена зоз хорским шпиваньом, а подкрадли ше ту и слизи нєстримани пре габи емоцийох котри порушали шицких присутних.

На Main наступел и одлични и популарни Tom Walker. Гоч би можебуц дахто гварел же звучи мегко и поп, на сцени звучел моцно. Помедзи писнї, котри публику охабяли скоро без словох, уметнїк спозорйовал шицких на траґедию дроґи, толкуюци же єдну свою писню, свой найвекши гит Leave the light on“, написал за приятеля у кризи, а єдну писню и за свою любов.

Рокенрол ше врацел на вельки дзвери и з америцким бендом Greta Van Fleet. Зоз своїм енерґичним наступом оправдали статус ґрупи о котрей ше вельо бешедує предходних рокох, а полни Main з нїма скакал, танцовал и шпивал зоз шерца.

Америцки состав The Chainsmokers зоз своїм наступом указали прецо су єдни з найпопуларнєйших гвиздох. Їх знїмки на YouTube зазначую и вецей як 10 милиярди препатрунки, а шицки гити на наступу публика провадзела зоз горским шпивом. На Main Stage направели журку за паметанє.

Того року mts Dance арена була у найспектакуларнєйшим виданю  потераз. На колосалней продукциї було старе винчанске писмо, а на бини наступели найвекши гвизди шветовей електронскей сцени. Заєднїцки наступ Carla Coxa и Maceo Plexa дзвигли енерґию на максимум, а тандем Соломуна и Tale of Us лєм потвердзели експлозию енерґиї при публики хтора уживала у каждим такту музики.

Шицким познате же EXIT нє лєм музични фестивал, а того року то потвердзели Йоко Оно и Новак Дьокович хтори за публику порихтали видео порученя, а на отвераню фестивалу були и дружтвени активисти зоз сиверноамерицкого племена Standing Rock чийо члени на перших борбених смугох за очуванє живота на Жеми.

Остатнього дня фестивалу, внєдзелю пополадню, Нови Сад и Петроварадин залапела велька нєпогода. Диждж упарто плющал, витор ламал конари, повалял древа, а знїщени були и велї бини. Заш лєм, з напруженьом велького числа людзох, простор бул пошорени и EXIT отворел свойо капури зоз малим пожнєньом.

Єдна з тих котра одушевела публику тей жимней EXIT-овскей ноци була Tarjа на Fusion Stage. Бувша вокалиста ґрупи Nightwish зоз своїм гласом дарк-метал преткала зоз симфонийнима елементами и з таку мелодию при публики виволала габи емоцийох. Вона по своїм образованю оперска шпивачка и з таким наступом, гласом и шпиваньом була наисце цошка окремне.

Найглєданша техно гвизда нєшка Amelie Lens, а праве вона мала чесц заврец цали EXIT и mts Dance арену. Єй виход на сцену провадзели моцни овациї публики. Свой наступ закончела зоз писню ,,Firestarter, на чесц покойного шпивача ґрупи The Prodigy, Keitha Flinta. Тото виволало общу еуфорию при публики, помишали ше емоциї. Бул то єден з найкрасших и найемотивнєйших завераньох EXIT фестивалу.

Пред спектакуларним наступом шветово познатих Dimitri Vegas & Like Mike, популарни америцки мотивацийни бешеднїк Генри Амар за публику порихтал даскельо слова. Визначел як важне отримац менталне здравє и поручел публики же кажде уж у себе ма тото цо глєда и нєт потреби же би хасновал наркотики.

Велька национална кампаня ,,Останьме чисти“ була интензивно промована на EXIT фестивалу и апеловала на шицких нащивительох же би вибрали чисти, здрави живот, без наркотикох. Зоз словами ,,Знаш одкадз приходзи твоя роба?“ положени акцент на проблем хаснованя дроґи на фестивалох и, вообще, у дружтву. Порушани озбильни питаня о походзеню дроґи, дотхнути велї теми, а опасносц од нїх нє ґурана под тепих, алє ше о нєй бешедовало, и наздаваме, роздумовало.

Зоз EXIT фестивалу рушела и нова гуманитарна акция ,,Вибудуйме оводи вєдно“ котру порушали Фондация Новак Дьокович и EXIT фондация, а потримали ю Радио телевизия Сербиї и наш успишни кошаркаш Никола Йокич.

Представена и кампаня ,,Врац природи. Придруж ше и посадз древо“  як акция садзеня 10 000 древкох на даскелїх локацийох у Войводини на єшень котру орґанизує Делеґация Европскей униї у Сербиї з потримовку Покраїнскей влади,  EXIT орґанизациї и OPENS.

EXIT и того року на OPENS State of Exit зони дал можлївосц рижним орґанизацийом же би представели свойо програми, та так у тей часци нашивителє могли одбавиц даяки квиз, направиц фризуру, нашминкац ше у духу EXIT-а, алє и научиц дацо о особних, правних, дружтвених шлєбодох, промовованих през бависко, розгварку лєбо танєц, участвовац у рижних роботньох, та аж и през телескоп патриц на гвизди.

По законченим тогорочним фестивалу, до своїх торбичкох зме спаковали прах, блїскотки (шльокици), полароид фотоґрафиї, даскельо беджи, пирка, и после штирох дньох – штирох виходох и заходох слунка, змахли зме фестивалу остатнїраз за тот рок. З вистатим крочайом, алє полни емоцийох и нєзабудлївих памятох, на Петроварадинскей капури зме гласно скричали – EXIT, видзиме ше нарок!

 

 

ПОВЯЗАНИ ТЕКСТИ