КУЛА – У рамикох порядних нащивох подручним канцеларийом, предсидатель Вивершного одбору Националного совиту (НС) Руснацох Желько Ковач вовторок, 24. мая, нащивел Подручну канцеларию (ПК) Совиту у Кули, у просторийох Руского КУД „Др Гавриїл Костельник”.
Члени Канцелариї, на чолє з єй координатором Владом Бучком, Ковача упознали з дотерашню и терашню роботу ПК (хтора вязана и за активносци спомнутого КУД), дзе визначене тогорочне анґажованє Кулянцох у орґанизованю Централней шветочносци за нагоди националного швета Руснацох, хтора ище скорей оценєна як барз успишна.
Як позитивне у роботи визначене и пририхтованє дзецинскей представи у руским КУД два роки за шором, а члени ПК и КУД виражели жаданє же би и того року з дзецинску представу госцовали у Словацкей, за цо им потребна помоц и НС. Як гварене, госцованє представи на фестивалє у Михаловцох би бул вельки стимул за роботу з дзецми у Кули.
На схадзки порадзене же би члени ПК утвердзели чи и як на державних установох, явних подприємствох и институцийох виписани табли по руски, после чого, кед будзе потреби, там дзе нє постоя надписи и на нашим язику, лєбо су ґраматично нєправилно написани, то будзе ришованє прейґ НС Руснацох.