РУСКИ КЕРЕСТУР – Друга лєтня журка на отвореним „PactON” отримана всоботу, 23. юлия вечар на рускокерестурским базену, дзе наступели бенди „Лазамерс” з Оджаку, домашнї „Crazy Cousins” („Крейзи казанс”) и популарни „Drop Sensei”, а у орґанизациї млади зоз Здруженя „Пакт Рутенорум”.
Нащивеносц була велька, а музика була за рижни ґенерациї, цо було видно и по рижнородних старосних ґрупох у публики. Попри Керестурцох, на „Пактовей” журки було нащивительох и зоз сушедних местох.
Публику перше з акустичним поп-рок репертоаром „зограл” бенд „Лазамер”, после чого наступели домашнї „Казанси”. Пре мале число наступох хторе маю през рок и вше одличну комуникацию з публику, Керестурци их вше барз добре прилапюю.
„Drop Sensei” на журки наступал и влонї, а пре добру атмосферу, музику и жаданє публики, орґанизаторе их поволали и того року, а одушевел баржей младшу ґенерацию.
Орґанизованє „PactON 2” финансийно потримали Месна заєднїца Руски Керестур и Општина Кула.
Дзень пред журку, на истим месце „Пактовци” орґанизовали и биоскоп на отвореним, дзе на бим-платну пущена британска комедия „Hot Fuzz”, а на тей розваги було красне число младих.