Миґранти и надалєй преходза през Шид ґу гранїци з Републику Горватску при Беркасове. Медзи гуманитарнима орґанизациями на терену и Каритасов тим котри миґрантом кажди дзень дзелї помоц у поживи и гиґиєнски пакети.
– У зависносци хтори дзень кельо єст потреби ми дзелїме миґрантом пакети поживи и гиґиєнски пакети хтори обезпечел Каритас зоз Нємецкей. Продукти сцигую до парохиї у Ґибарцу, дзе ше пририхтує точно так як донатор одредзел, а потим на комбию одвожи на пункт дзе ше их дзелї. У тей хвильки на спомнутих активносцох анґажовани шесцеро волонтере и вожач – гвари Маґдалена Павлович, координаторка за розподзельованє гуманитарней помоци Каритасу на подручу општини Шид.
Пущени млади фазани до хотара
Прешлого викенду члени Ловарского Дружтва „Заяц” до хотару пущели остатнє количество од 400 фазанох, кельо викармели у своєй нововибудовей фазанериї. Потераз их куповали на рижних местох, а одкеди маю свой обєкт, сезона лову предлужена за мешац днї, по конєц януара. Потамац ловаре буду виходзиц єденац раз до лову.
Здруженя женох „Байка” и „Идея” закончели проєкти тканя
Тогорочни проєкт Здруженя женох „Байка” з назву „Зачувайме традицию” урядово закончени 30. октобра зоз його представяньом гражданом Руского Керестура. У рамикох проєкта жени ушили штири женски народни облєчива за роботу, цо аж и вецей як ше заплановало.
Здруженє женох „Идея” зоз Кули штредком октобра тиж почали основну обуку тканя на кроснох, а у рамикох проєкта „Стари ремесла у нашим краю”. Обуку ше отримовало у просторийох Руского КУД „Др Гавриїл Костельник” у Кули, а водзела ю членїца „Идеї” Павлина Такач. Окрем теорийней часци о тканю, були и практични годзини снованя, цо и найкомпликованша часц у тей роботи. Проєкт закончени 4. новембра дзе ше коло дзешец жени з „Идеї” хтори участовали на обукох, самостойнє учели ткац.
