На бокох рубрики „Нашо места” у найновшим, 36. числу, пишеме о швету Рождества Богородици, на хторе вовторок, 8. септембра, у Миклошевцох шветочно преславени Кирбай. Кирбай возвелїчал и владика крижевски, кир Никола Кекич. У грекокатолїцкей церкви, хтора ма мено Мацери Божей, отримани два Служби – ранша на осем годзин, а на єденац Архиєрейска Служба Божа, котру предводзел владика Кекич.
На тих бокох пише и о:
ЦЕНИ ПРЕБУВАНЯ МЕДЗИ НАЙВИГОДНЄЙШИМА У СРИМЕ
– До Предшколскей установи „Єлица Станивукович-Шиля” у Шидзе и у валалох шидскей општини ходза коло 850 дзеци, а цени пребуваня нєпременєни и того року су медзи найвигоднєйшима у Сриме – гварела Ясмина Варґа, директорка ПУ „Єлица Станивукович-Шиля”.
За пребуванє дзецох од єдного до шейсц роки родичи мешачно плаца 3 500 динари. Цена за пририхтуюци ґрупи з цалодньовим пребуваньом 3 тисячи динари, а полудньове пребуванє пририхтуюцих ґрупох тисяч динари мешачно.
ОБЩИ ШПИТАЛЬ ВЕРБАС ДОСТАЛ ДОНАЦИЮ
Служба радиолоґийней дияґностики Общого шпиталю Вербас достала вредну донацию од Служби радиолоґийней дияґностики Дома здравя Нови Сад. Слово о 14 касетох за розвиванє РТҐ филмох и клима пошоренє.
