БЕОҐРАД – Руководство Радио-телевизиї Сербиї (РТС) и Министерство култури и информованя бешедую о злєпшованю квалитету програми за национални меншини, гварел державни секретар Министерства Саша Миркович на округлим столє „Витворйованє правох националних меншинох у обласци информованя“.
По шицких домашнїх и медзинародних реґулативох о явних медийних сервисох, єдна з їх важних функцийох то емитованє програмох на язикох националних меншинох. Гоч у Сербиї постоя два явни сервиси, тоту функцию окончує лєм Радио-телевизия Войводини (РТВ), хтора емитує програми на 10 язикох националних меншинох, а фаховци з обласци медийох уж длуго апелую на РТС же муши увесц таки змисти.
Як наведол державни секретар Миркович, РТС и РТВ того року з державного буджету достаню вєдно 8,7 милиярди динари, цо за 3 милиярди вецей як прешлого року. З тей суми 77,5 одсто достанє РТС, а 22,5 одсто РТВ.