На „Вельким панонским вашаре” и аматере з наших местох

автор тах
751 Опатрене

ВЕРБАС – Од 23. по 25. септембер у Центре за физичну културу „Драґо Йовович” у Вербаше отримана манифестация „Вельки панонски вашар”, у чиїх рамикох бул 8. Фестивал дзецинских жридлових ансамблох, 38. Фестивал фолклорних традицийох Войводини и 9. Вистава старих ремеслох, домашнього виробнїцтва и етно-кухнї.

Дзецински жридлово ансамбли наступели перши дзень манифестациї, а исти дзень бул и концерт госцуюцого Фолклорного ансамблу „Вила”, як и ансамблу Дому култури Вербас.

У предлуженю манифестациї през дзень могло опатрац штанди на хторих були виложени ручни роботи, коштовац народни єдла, опатриц народне облєчиво и инструменти мадярскей националней заєднїци, чия материялна и духовна култура окреме представена на тогорочним „Вельким панонским вашаре”.

Соботу и нєдзелю отримани концерти у рамикох Фестивалу фолклорних традицийох Войводини, на хторих наступели ансамбли з цалей покраїни, а медзе вецей як 80 точками Фестивалу наступели и аматере з наших местох.

Всоботу, 24. септембра, з двома рускима шпиванками на Фестивалє участвовала Женска шпивацка ґрупа КУД „Жатва” з Коцура, а вчера, тиж з по двома нашима шпиванками Женска шпивацка ґрупа КУД „Петро Кузмяк” з Нового Орахова и Хлопска шпивацка ґрупа Дому култури Руски Керестур.

На Фестивал ше пласовали и Дзивоцка и Женска шпивацка ґрупа и Тамбурови оркестер керестурского Дому култури, алє пре интензивне пририхтованє за „Червену ружу” и вчерайши проби – нє наступели на Фестивалє у Вербаше.

ПОВЯЗАНИ ТЕКСТИ