РУСКИ КЕРЕСТУР – У центру Руского Керестура всоботу, 13. авґуста, пияту Туристично-привредно-културну манифестацию „Днї керестурскей паприґи” урядово отворели заменїк предсидателя Општини Кула Кароль Валка, спред Покраїнского секретарияту за польопривреду, водопривреду и лєсарство Предраґ Ґаїч, як и предсидатель Здруженя паприґарох „Капсикум анум” Владимир Варґа.
Пред вельким числом нащивительох отримани Дефиле парадних запрагох членох домашнього Конїцкого клубу „Русин” и їх госцох, а у културно-уметнїцкей часци програми наступели госци зоз Словацкей. Шпивацки ґрупи Фолклорного ансамблу „Тепличан” зоз Земплинскей Теплици наступели з вецей шпиванками, под руководзеньом Терези Кубаньовей котра и провадзела шпивачох на гармоники. У тей часци, по тактох їх шпиванки, затанцовала и дзецинска танєчна ґрупа домашнього Дому култури зоз хореоґрафку Ґабриєлу Саянкович.
Главни орґанизаторе Манифестациї Здруженє паприґарох „Капсикум анум” и Конїцки клуб „Русин”, а тогорочну манифестацию финансийно найвецей потримали Општина Кула и Покраїнски секретарият за польопривреду, водопривреду и лєсарство, як и ище коло 27 рижни спонзоре. Орґанизацию манифестациї зоз своїма услугами лєбо продуктами помогли ище тринац спонзоре з валалу.
Фото-ґалерию зоз цалей манифестациї годно поопатрац на нашим сайту и на боку Рутенпреса у цеку нєшкайшого дня.